काठमाडौँ । परम्परागत शैलीभन्दा फरक तरिकाले स्मृति शेष खगेश्वर ढकालको दोस्रो स्मृति कार्यक्रम सम्पन्न गरिएको छ ।
२०८० भदौ २२ गते शुक्रवारका दिन नयाँबजारस्थित ज्ञानशाला अनुसन्धान केन्द्रको हलमा सो कार्यक्रम सम्पन्न गरिएको हो ।
ढकाल परिवारका सदस्य तथा स्मृति शेष खगेश्वर ढकालका शुभचिन्तकसमेतको सहभागितामा स्मृति कार्यक्रम सम्पन्न भएको थियो ।
कार्यक्रममा स्मृति शेष खगेश्वरको जीवनका विभिन्न पक्षका बारेमा चर्चा–परिचर्चा गरिएको थियो ।’
बुबाले हामीलाई छोडेर जानुभयो । मृत शरीर नरहे पनि उहाँका विचार युग–युगसम्म कार्यान्वयनको विषय रहिरहने छन्’ स्मृति कार्यक्रमको अवसरमा उहाँका छोरा डा. चूडा ढकालले बताउनुभयो ।
स्मृति कार्यक्रममा आफ्नो धारणा राख्दै खगेश्वर ढकालकी बुहारी तथा प्राज्ञ सदस्य डा.कौशीला रिसालले कतिपय संस्कार तथा परम्परा समय र परिस्थितिअनुसार परिवर्तन गर्दै जानुपर्ने बताउनुभयो । उहाँले कार्यक्रममा केही कविता पनि वाचन गर्नुभएको थियो ।
कार्यक्रममा प्रलेसका उपाध्यक्ष समीर सिंह, छोरा भोलानाथ ढकाल, राजेन्द्रप्रसाद ढकाल, विष्णुप्रसाद देवकोटा, कल्पना देवकोटालगायतले पनि स्मृति शेष ढकालका विभिन्न पक्षको बारेमा चर्चा गर्नुभएको थियो ।
१९८८ फागुन २२ गते गोरखाको थालाजुङमा जन्मिनुभएको ढकालको २०७८ भदौ २२ गतेका दिन मृत्यु भएको थियो । उहाँ जीवनभरि समाजसेवामा क्रियाशील हुनुहुन्थ्यो ।
