नयाँ दिल्ली, २० असोज । एसियाली खेलकुदमा भारतको उत्कृष्ट प्रदर्शन जारी राख्दै भारतले पहिलो पटक १०० पदक जितेको छ ।
आज बिहानसम्म भारतले एसियाली खेलकुदमा पदक सङ्ख्या १०० पुराएको छ ।
एसियाली खेलकुदको १४ औँ दिनको सुरुवात पनि भारतको लागि राम्रो रह्यो । भारतीय खेलाडीले पदक जितेका छन् । १३ औँ दिन भारतका लागि उत्कृष्ट रह्यो । साबिक विजेता जापानलाई हराउँदै भारतले ९ वर्षपछि हक्कीमा स्वर्ण पदक जितेको छ । हक्की टोलीले स्वर्ण जितेपछि प्रधानमन्त्री नरेन्द्र मोदीले पनि टोलीलाई बधाई दिएका छन् ।
यस पटक भारतले एसियाली खेलकुदमा कीर्तिमानी पदक जित्दै पदकको शतक बनाएको छ । यसअघि खेलकुदको १३ औँ दिनसम्म भारतीय खेलाडीले २२ स्वर्णसहित ९५ पदक जितेका थिए भने आज ५ पदक जितेर पदकको शतक पूरा गरेका छन् । हङझाउ एसियाली खेलकुदमा भारतीय खेलाडीले कीर्तिमान बनाउने क्रम जारी छ । ‘यस पटक सय पार गर्ने’ लक्ष्य लिएर चीन पुगेका भारतीय खेलाडीले सयभन्दा बढी पदक जितेका हुन् ।
एसियाली खेलकुदको १३ औँ दिन भारतले हक्कीमा स्वर्ण सहित ९ पदक जितेर पदक सङ्ख्या ९५ पुगेको छ । सय पदक पार गर्ने निश्चित थियो किनभने धेरै इभेन्टमा भारतीय खेलाडीहरू फाइनलमा पुगेका थिए, पदकको रङ्ग मात्र तय हुन बाँकी थियो। र आज बिहान ५ पदक जित्दै भारतले पदकको सङ्ख्या १०० नघाएको हो ।
भारतीय टोलीले फाइनल खेल्ने भएकाले क्रिकेटमा पदक निश्चित छ। पुरुष युगलमा सात्त्विक–चिरागको जोडी फाइनलमा पुगेकाले ब्याडमिन्टनबाट अर्को पदक जित्ने ठाउँ कायमै छ । अर्थात् भारतले कम्तीमा १०२ पदक जित्ने पक्का छ। एसियाली खेलकुदको इतिहास हेर्दा भारतले पहिलो पटक पदक सयको लक्ष्य पूरा गरेको छ । यस बाहेक भारतीय खेलाडीले देशका लागि २० भन्दा बढी स्वर्ण जितेको यो पहिलो पटक हो।
भारतले २०१४ एसियाली खेलहरूमा ५७ पदक जितेको थियो। त्यसपछि सन् २०१८ मा भारतले ७० पदक जितेको थियो भने अब सन् २०२३ को एसियाली खेलकुदमा भारतले पदकको शतक बनाएर कीर्तिमान बनाएको हो ।
