कात्तिक २०, काठमाडौँ । शुक्रबारको भूकम्पले ठूलो रुपमा जनधनको क्षति पुर्याएको जाजरकोट र रुकुम पश्चिममा परकम्प जाने क्रम रोकिएको छैन ।
सोमबार अपरान्ह ४ः३१ मा पनि जाजरकोटको बारेकोट गाउँपालिका– १ रामीडाँडा केन्द्रविन्दु भएर ५.८ रेक्टर स्केलको परकम्प गएको छ ।
जसका कारण जाजरकोटमा यसअघिको भूकम्पले हल्लाएका घर तथा संरचनाहरु भत्किएका छन् । सोमबारको परकम्पमा केही घाइते समेत भएका छन् । सोमबारै ४ बजेर ४० मिनेटमा जाजरकोटकै पैंक केन्द्रविन्दु भएर ४.५ रेक्टर स्केलको अर्को परकम्प गएको छ ।
यसरी बारम्बार भूकम्पका झट्का महसुस भइरहदा भूकम्प प्रभावित नागरिक थप त्रसित बनेका छन् । यसैपनि घरबार बिहिन भएर बाहिर बसिरहेका भूकम्प प्रभावितहरु बारम्बारको परकम्पका कारण थप चिन्तित बनेका छन् ।
शुक्रबारको भूकम्पका कारण जाजरकोटमा १०१ र रुकुममा ५२ गरी १ सय ५३ जनाको मृत्यु भएको जिल्ला प्रशासन कार्यालयले पुष्टि गरिसकेको छ ।
भूकम्पले घर भत्काएपछि प्रभावितहरु बारीको पाटो तथा बाटोमा नै खुल्ला आकाशमुनि रात काटिरहेका छन् । चिसो बढ्दै जाँदा दिउँसोमा ठिकै भएपनि रातीको समय बिताउन समस्या भएको भूकम्प प्रभावितहरुको गूनासो रहेको छ ।
चिसोमा भूकम्प प्रभावितको बिचल्ली
भूकम्पले घर भत्काएपछि प्रभावितहरु बारीको पाटो तथा बाटोमा नै खुल्ला आकाशमुनि रात काटिरहेका छन् । चिसो बढ्दै जाँदा दिउँसोमा ठिकै भएपनि रातीको समय बिताउन समस्या भएको भूकम्प प्रभावितहरुको गूनासो रहेको छ ।
बिशेष गरि सुत्केरी, बालबालिका तथा जेष्ठ नागरिकलाई रात कटाउन समस्या परेको छ । सरकारले उद्धारको काम तिब्र रुपमा गरेको भएपनि राहतका सामग्री बितरणमा ढिलाइ गरेको भन्दै असन्तुष्टि सुरु भएको छ ।
राष्ट्रिय तथा अन्तराष्ट्रिय स्तरबाट राहत सामग्री घोषणा भएको र जाजरकोटका लागि पठाईएको भनेपनि सम्बन्धित पीडितहरुले नपाएको गूनासो गरेका छन् ।
