२१ फाल्गुन, काठमाण्डौं – प्रधानमन्त्री पुष्पकमल दाहालले नयाँ गठबन्धन बनाएकोबारे स्पष्ट भइनसकेको भन्दै नेकपा एकीकृत समाजवादीले गुण र दोषका आधारमा धारणा बनाउने निर्णय गरेको छ ।
प्रधानमन्त्री दाहालले कांग्रेस र एकीकृत समाजवादीसहितको गठबन्धन तोडेर एमालेसहितका दलहरुसँग अर्को गठबन्धन बनाएपछि सोमबार दिउँसो बसेको बैठकले नयाँ गठबन्धनको गुण र दोषका आधारमा धारणा बनाउने निर्णय गरेको हो ।
बैठकपछि महासचिव घनश्याम भुसालले प्रधानमन्त्री दाहालले लिएको निर्णयका उद्देश्य, प्रक्रिया र संरचनाका बारेमा सबै विषय अगाडि आएपछि तिनको गुण र दोषका आधारमा पार्टीले आफ्ना नीतिहरु स्पष्ट पार्ने बताएका छन् ।
‘प्रधानमन्त्रीले नयाँ निर्णय लिएसँगै मुलुक फेरि अर्को राजनीतिक समीकरणमा प्रवेश गरेको छ । नयाँ समीकरणको उदेश्य, प्रक्रिया र संरचना अझै स्पष्ट भइसकेको छैन,’ भुसालले विज्ञप्तिमार्फत् भनेका छन्, ‘तसर्थ प्रधानमन्त्रीले लिएको निर्णयका उद्देश्य, प्रक्रिया र संरचनाका बारेमा सबै विषय अगाडि आएपछि तिनको गुण दोषका आधारमा आफ्ना नीतिहरु स्पष्ट पार्नेछौँ ।’
