पहिरोको कारण विपी र मदनभण्डारी राजमार्ग अबरुद्ध

सिन्धुली  । पहिरोको कारण सिन्धुली जिल्ला स्थित वीपी राजमार्ग र मदन भण्डारी राजमार्ग शुक्रबार बिहानै देखि अबरुद्ध भएका छन् ।
जिल्ला प्रहरी कार्यालय सिन्धुलीका अनुसार बनेपा–सिन्धुली–बर्दिवास (विपी) राजमार्ग अन्तरगत सिन्धुली–बनेपा खण्ड अबरुद्ध भएको छ । यस्तै मदन भण्डारी राजमार्ग अन्तरगत सिन्धुली–बागमती खण्ड अबरुद्ध छ ।
लगातारको वर्षाका कारण सडक माथीबाट पहिरो र लेदो खस्दा वीपी राजमार्ग अन्तरगत काभ्रेको माम्ती खोलामा आएको बाढी र पहिरोले सडक अबरुद्ध भएको छ ।
यस्तै मदन भण्डारी राजमार्ग अन्तरगत हरिहरपुरगढी गाउँपालिका ४ हाकपारामा पहिरो खस्दा सडक अबरुद्ध छ ।
सिन्धुलीका प्रहरी प्रमुख गोविन्दराज काफ्लेका अनुसार हाकपारमा सडक माथिबाट ढुंगा र लेदो आएर सडकमा थुप्रीदा सडक अबरुद्ध भएको हो ।
अबरुद्ध सडक खुलाउन हरिहरपुरगढी गाउँपालिकाको जेसीवी लगाएर पहिरो पन्छाउनेकाम सुरु गरिएको छ ।
यस्तै मदन भण्डारी लोकमार्ग अन्तरगत मरिण गाउँपालिकाको २ नम्बर वडामा समेत ढुंगा खसेर जोखिम बढेको प्रहरीको भनाई छ ।
सडक अबरुद्ध हुँदा सयौं सवारी साधन र यात्रुहरु अलपत्र परेका छन ।
अबरुद्ध सडक खुलाउन प्रहरी र स्थानीय प्रयासरत भएपनि वर्षा नरोकीएकाले थप समस्या भएको बताइएको छ ।