सिन्धुली । सिन्धुलीको मरिण गाउँपालिका ७ महेश्वता छापमा रहेको श्री कपिलकोट माध्यमिक विद्यालय छाप–महेश्वताको ६४ औँ बार्षिकोत्सव तथा अभिभावक दिवस विभिन्न कार्यक्रम गर्दै सम्पन्न भएको छ ।
कार्यक्रम विद्यालय व्यवस्थापन समितिका अध्यक्ष राजकुमार श्रेष्ठ (उत्साह) को अध्यक्षता तथा प्रतिनिधिसभा सदस्य राजन दाहालको प्रमुख आतिथ्यता तथा मरिण गाउँपालिकाका अध्यक्ष विमर्श मोक्तान (प्रख्यात) को विशिष्ट आतिथ्यतामा भएको हो ।
बाषिकोत्सव कार्यक्रमलाई सम्बोधन गर्नुहुँदै कार्यक्रमका प्रमुख अतिथी तथा प्रतिनिधिसभा सदस्य राजन दाहालले छोटो समयमानै कपिलाकोट माविमा धेरै प्रगती गरेको उल्लेख गर्दै नेतृत्व सक्षम भए काममा पनि प्रगती देखिने बताउँनुभयो ।
विद्यालयले छात्रवृद्धि कोष स्थापना गर्दै विद्यार्थीहरुमा रचनात्मक र सिर्जनात्मक गतिविधिहरु संगै अनुशासनलाई जोड दिँदा विद्यालयको शैक्षिक वातावरणमा समेत अब्बलता देखिँदै गएको उहाँको भनाई छ । विद्यालयले अभिभावक र विद्यार्थीहरुमा आत्मविश्वास बढाउन सके मात्रै विद्यार्थीहरुको चाप बढ्ने उहाँले बताउनुभयो ।
मरिण गाउँपालिकाका अध्यक्ष विमर्श मुक्तानले कपिलाकोट माविलाई नमुना विद्यालय बनाउन स्थानिय सरकारले कुनै पनि कसुर बाँकी नराख्ने उल्लेख गर्नुभयो । उहाँले अहिले सम्म विद्यालयले प्रस्ताव गरेको अधिकांश कार्यक्रमहरुमा गाउँपालिकाले सहयोग गर्दै आएको बताउनुभयो ।
माओवादी केन्द्र मरिण गाउँसमितिका अध्यक्ष काजीमान थिङले पछिल्लो समय अंग्रेजी भाषा पढाउने बाहानामा अभिभावकहरुले बालबालिकाहरुलाई निजी विद्यालय रोज्दा सामुदायिक विद्यालयहरुमा विद्यार्थी घढ्दै गएको बताउनुभयो ।
वार्षिकोत्सवको अवसरमा विद्यालयका प्रधानाध्यापक अमृतसिं घिसिङले आर्थिक बर्ष २०८०÷०८१ को कुल ४ करोड १० लाख ३२ हजार ६ सय ३१ रुपैंया बराबरको आर्थिक आयव्यय प्रस्तुत गर्नुभएको थियो । विद्यालयका प्रधानाध्यापक घिसिङले विद्यालयको शैक्षिक सुधारका प्रयास, तत्कालिन, अल्पकालीन र दिर्घकालीन योजनाहरु समेत सार्वजनिक गर्नुभएको छ ।
बाषिकोत्सवको अवसरमा विद्यालयले छात्रवृत्ति अक्षयकोषबाट प्राप्त भएको २ लाख ६९ हजार रुपैयाँ आर्थिक रुपमा गरिव, विपन्न, जेहेदार र पिछडिएका १ सय ८ जना विद्यार्थीहरुलाई छात्रवृत्ति वितरण गरिएको छ ।
विद्यालयले उत्कृष्ट शिक्षक, कर्मचारीका साथै छात्रवृत्ति कोषका संस्थापक सदस्यहरुलाई सम्मान समेत गरेको छ । कार्यक्रममा मरिण गाउँपालिकाका प्रमुख प्रशासकीय अधिकृत विकास सुन्दास, छात्रवृत्तिकोषका संस्थापक सदस्यहरु, अभिभावक, शिक्षा प्रेमी, विद्यार्थीहरुको उपस्थिति रहेको थियो ।
