सिन्धुली । ७३ औं कानून दिवस आज सिन्धुलीमा पनि एक कार्यक्रमबिच मनाइएको छ ।
जिल्ला अदालत सिन्धुलीको सभा हलमा आयोजित उक्त दिवसमा कार्यक्रमका अध्यक्ष माननीय जिल्ला न्यायाधीश गेहेन्द्रराज पन्तले न्याय सम्पादनको शिलशिलामा सबैलाई छिटोछरितो र सर्वसुलभ न्याय प्रदान गर्नु आजको मूख्य आवश्यकता रहेको औल्याउनुभयो । कानूनी काम कार्बाहीहरु पारदर्शी र स्वतन्त्र हुनुपर्नेमा जोड दिदै उहाँले जनतालाई सन्तुष्ट बनाउनुपर्ने बताउनुभयो । कतिपय सन्दर्भमा कार्यपालिका र व्यवस्थापिकालाई समेत सहि ट्र्याकमा ल्याएर न्यायपालिकाले सहि दिशानिर्देश गर्ने भूमिका समेत निर्बाहा गरेको पनि उहाँले बताउनुभयो ।
कानून दिवसको अवसरमा जिल्ला न्यायधिवक्ता निमा घिमिरे, नेपाल वार एशोसियशन सिन्धुलीका अध्यक्ष मोहन थापा, जिल्ला श्रेस्तेदार बिदुर कोईराला, अधिबक्ता बिश्वम्भर लामिछाने, अधिकृत डेढकुमार ढकाल लगायतले शुभकामना मन्तव्य राख्नुभएको थियो ।
कार्यक्रममा जिल्लाका कानून व्यवसायिहरु, न्याय प्रशासनका कर्मचारीहरुको उपस्थिति रहेको थियो ।
न्यायपालिका प्रतिको जनबिश्वासलाई अझ बलियो बनाउन तथा न्यायमा सबैको पहुँच सुनिश्चित गर्दै न्यायीक सुशासनको प्रबर्द्धनमा जोड दिन आज देशभर कानून दिवस मनाईदै छ ।
कानून र न्यायको क्षेत्रमा चासो राख्नेहरुका लागि आजको दिन बिशेष दिन हो । बि.स. २००७ सालमा प्रजातन्त्र स्थापना पश्चात् २००८ सालमा प्रधान न्यायलय ऐन जारी भई २००९ साल बैशाख २६ गते राजा त्रिभुवनबाट लालमोहर लगाएको दिनको स्मरणमा यो दिनलाई कानून दिवसको रुपमा मनाउन प्रारम्भ भएको हो ।
