स्नाकोत्तर अध्ययनरत अबिबाहित छोरीलाई सुनकोसीमा सम्मान

सिन्धुली । सिन्धुलीको सुनकोसी गाउँपालिकामा स्नाकोत्तर अध्ययनरत अबिबाहित छोरीलाई सम्मान तथा छात्रावृत्ति वितरण गरिएको छ ।
विचैमा पढाई छाड्दै बिवाह गर्नेहरुको संख्या बढ्दै गएपछि स्नाकोत्तर अध्ययनरत अबिबाहित छोरीहरुलाई प्रोत्सहान स्वरुप सम्मान गरेको हो ।
गाउँपालिकाका प्रमुख प्रशासकीय अधिकृत अर्जुन दर्जीका अनुसार गाउँपालिकाको वार्षिक कार्यक्रम अनुसार पालिकाका १५ जना अबिबाहित छोरीहरुलाई सम्मान गरिएको हो ।
उनिहरुलाई गाउँपालिकाका अध्यक्ष दिपा बोहोरा दाहालले आइतबार एक कार्यक्रमका विच सम्मान गर्नुभएको हो ।
उनिहरुलाई जनही १८ हजार रुपैयाँ नगद सहित दोसल्लाह ओढाएर सम्मान गरिएको हो ।
‘गाउँपालिका भित्र बसोबास गर्ने र पालिका भित्रै स्नाकोत्तर अध्ययनरत छोरीहरुलाई सम्मान गर्दा अन्य किशोरीहरुमा समेत उच्च शिक्षा अध्ययनगर्ने हौसला प्रदान गर्न गाउँपालिकाले छात्रावृत्ति स्वरुप सम्मान गरेको हो,’ प्रमुख प्रशासकीय अधिकृत दर्जीले भन्नुभयो ।
स्नाकोत्तर अध्ययनरत अबिबाहित छोरीहरुलाई यस्तो सम्मान गर्दा बालबिबाह न्यूनिकरण, उच्चशिक्षामा महिलाको पहुँच पुग्ने र आफु सक्षम भएर बिबाह गर्न सकुन भन्ने उद्देश्यले गाउँपालिकाले यस्तो कार्यक्रम अघि सारेको गाउँपालिकाका अध्यक्ष दिपा बोहोरा दाहालको भनाई छ ।
आगामी वर्ष गाउँपालिकाले स्नाकोत्तर पढ्ने छोरी बुहारी दुबैलाई सम्मान गर्ने कार्यक्रम ल्याउने समेत अध्यक्ष दाहालको भनाई छ ।
यसरी सम्मान गरिएका छोरीहरुको रेकर्ड राख्ने, इन्टर्नमा जागिर खुवाउने र उनिहरुलाई उच्चशिक्षा हाँसिल गर्न जोड दिने बताइएको छ ।
गाउँपालिकाका अध्यक्ष दाहालको अध्यक्षतामा भएको कार्यक्रममा उपाध्यक्ष कपिल कुमार कोइराला, प्रमुख प्रशासकीय अधिकृत अर्जुन दर्जी, ७ वटै वडाका वडाध्यक्षहरु, कार्यपालिका सदस्यहरु लगायत विभिन्न विद्यालयका शिक्षक तथा विद्यार्थीहरुको उपस्थिति रहेको थियो ।