विद्यार्थी भर्ना अभियानलाई प्रभावकारी बनाऔं

‘सबै बालबालिकाको विद्यालयमा सहभागिता, गुणस्तरिय शिक्षा प्राप्तीको शुनिश्चितता’ भन्ने आदर्शका साथ शैक्षिक सत्र २०८१ का लागि विद्यार्थी भर्ना अभियान सुरु हुँदै छ । सरकारले विद्यालय बाहिर रहेका बालबालिकाहरुलाई विद्यालयमा ल्याउन देशभर भर्ना अभियान सुरु गरेको हो । बैशाख २ गतेबाट विद्यार्थी भर्ना अभियान सुरु हुदैछ । सरकारले माध्यमिक तहसम्मको शिक्षालाई अनिवार्य र निशुल्क भनेको छ । अभियान अन्तरगत अनिवार्य शिक्षाका लागि विद्यार्थी भर्ना, विद्यालयमा स्वागत तथा विद्यार्थी टिकाउ र शिकाई उपलब्धीमा सुधार लगायतका काम गर्नुपर्ने हुन्छ । विद्यार्थी भर्ना अभियानका लागि सहजिकरण कार्य योजना पनि बनाउन आवश्यक छ । तर, सिन्धुलीका स्थानीय तहका सामुदायिक विद्यालयहरुमा यस्ता प्रयासहरु हुने गरेको पाइदैन । अभियान अन्तरगत सार्वजनिक सन्देश सहितका ब्यानर, पम्प्लेट, प्रचार प्रसार सामाग्रीहरु समेत तयार गरिदैन । यस वर्ष जिल्लाका स्थानीय सरकारहरुले सरकारी कर्मचारी, शिक्षक, जनप्रतिनीधिका छोेराछोरीलाई अनिवार्य रुपमा सामुदायिक विद्यालयमा भर्ना गराउन भनेका छन् । यद्यपी विद्यार्थी भर्ना अभियानमा समाजका अगुवा, राजनितिक दल, निर्वाचित जनप्रतिनीधिहरुको प्राथमिकताका साथ चासो रहेको पाइदैन । शिक्षा पाउनु हरेक बालबालिकाको संविधानप्रदत्त एवं जन्मसिद्ध मौलिक अधिकार हो । यसलाई कार्यान्वयन गर्न नेपालको संविधान र निःशुल्क शिक्षासम्बन्धी ऐनबमोजिम २०८५ वैशाखभित्र आधारभूत तहको शिक्षा अनिवार्य सुनिश्चित गराउनुपर्ने कार्यभार तिनै तहको सरकार सामु रहेको छ । सरकारले देशैभरबाट ७ लाख १३ हजार विद्यालय उमेर समुहलाई विद्यालयमा ल्याउने गरि देशैभर भर्ना अभियान गर्ने जनाएको छ । सिन्धुली जिल्लामा मात्र यस वर्ष ६४ हजार बढी बालबालिकाहरुलाई विद्यालयमा भर्ना गराईने छ । जिल्लामा प्राथमिक तहका ३ सय ६२, निम्न माध्यमिक तहको ८१ र माध्यमिक तहको १ सय २० वटा गरी कुल ५ सय ६३ वटा सामुदायिक विद्यालयहरु रहेका छन । सामुदायिक विद्यालयहरुमा वर्षेनी विद्यार्थी भर्ना अभियान संचालन हुनेगरेपनि विद्यार्थीको संख्या बढेनबढेको कुनै तथ्यांक छैन । विद्यालयमा भर्ना गराउन भन्दापनि टिकाउन कठिन भईरहेको अवस्थामा यस वर्षको विद्यार्थी भर्ना अभियान पनि केवल नारामा मात्र सिमित नबनोस शुभकामना ।