सिन्धुली । सिन्धुलीको घ्याङलेख गाउँपालिकामा ५७ हजार ८ सय ९४ वटा घरपुलुवा पशुपंक्षी रहेको पाइएको छ ।
गाउँपालिकाले सार्वजनिक गरेको कृषि मत्स्य तथा पशु तथ्यांक २०८१ अनुसार गाउँपालिकामा गाई, भैंसी, बाख्रा, कुखुरा, सुंगुर, परेवा लगायतका घर पालुवा पशुपंक्षिहरुको संख्या ५७ हजार ८ सय ९४ रहेको हो ।
गाउँपालिकाका प्रमुख प्रशासकीय अधिकृत दाताराम प्याकुरेलका अनुसार घ्याङलेखका १ देखि ५ नम्बर वडामा सबैभन्दा धेरै बाख्रा पालन गर्ने गरिएको पाइएको छ । पालिकामा किसानहरुले ३२ हजार १ सय ३६ वटा बाख्रा पालेका छन । १७ हजार ६ सय ४३ वटा स्थानीय कुखुरा रहेका छन ।
‘पालिकामा ५ हजार ४ सय २६ वटा भैंसी र २ हजार २ सय ७५ वटा गाई पालन गरिएको पाइएको छ,’ प्याकुरेलले भने ।
२ सय ३५ वटा बंगुर, १ सय ७५ वटा परेवा र ४ वटा टर्की रहेका छन । २ हेक्टर क्षेत्रफलमा माछा पालन गरिएको छ भने १ हजार २८ घार मौरी पालन गरिएको छ ।
यस्तै गाउँपालिकाका कृषि विकास शाखा प्रमुख छिरिङ दोर्जे लामाका अनुसार घ्याङलेखमा २ सय ७४ दशमलव १ हेक्टरमा धान, १ हजार १ सय ८० हेक्टरमा मकै र १ हजार ९ सय ८५ हेक्टरमा तरकारी खेति गर्ने गरिएको तथ्यांकले देखाएको छ ।
घ्याङलेख गाउँपालिका कृषि तथा पशु पालनमा लागि उपयुक्त मानिन्छ । यस क्षेत्रमा जुनार, सुन्तलता र कागती खेति गर्ने किसानहरु समेत प्रसस्त रहेको पाइएको छ ।
पालिकामा १६ हजार ४ सय ३६ बोट कागती, १ हजार ७ सय ७९ बोट जुनार र ९ सय ९४बोट सुन्तला खेति गरिएको छ ।
यस्तै अलैंचि, केरा, कफि, चिया, अनार लगायतका खेति समेत घ्याङलेख गाउँपालिकामा गर्ने गरिएको पाइएको छ ।
