सिन्धुली । सिन्धुलीको घ्याङलेख गाउँपालिका ४ नेत्रकाली बेलबोटमा नवनिर्मित स्वास्थ्य चौकी (वर्थिङ्ग सेन्टर) भवनको उद्घाटन गरिएको छ ।
अति दुर्गम मानिने उक्त क्षेत्र लामो समयको प्रतिक्षा पछि निर्माण सम्पन्न भवनको प्रतिनिधि सभा सदस्य लेखनाथ दाहाल (राजन) ले उद्घाटन गरेका हुन् ।
भवन उद्घाटन गर्दैै प्रतिनिधिसभा सदस्य दाहालले नयाँ भवनबाट गुणस्तरीय स्वास्थ्य सेवा प्रवाह हुने अपेक्षा व्यक्त गरे ।
स्वास्थ चौकीका लागि आवश्यक उपकरण र कर्मचारी दबन्दीका विषयमा संघीय सरकारमार्फत उपलब्ध गराउन पहल गर्ने दाहालले प्रतिबद्धता जनाए ।
‘शिक्षा, स्वास्थ्य र रोजगार संविधानले मौलिक हकको रुपमा स्थापित गरेको छ । त्यसैले आवश्यक दरबन्दी र सामग्रीका लागि बजेट व्यवस्थापन गर्नु सरकारको दायित्व हो । संघीय सरकारमा यसका लागि पहल गर्ने प्रतिबद्धता जनाउँछु,’ उनले भने ।
घ्याङलेख गाउँपालिकाका अध्यक्ष जगत बहादुर भोलनले विकास निर्माणमा जनप्रतिनिधिहरु एक ढिक्का भएर अगाडी बढ्न नसक्दा समस्या हुने गरेको बताए ।
उनले राजनितिक दलहरु प्रति लक्षित गर्दै भने, ‘विकासका कुरामा एक हुनपर्छ । कोहि उत्तर फर्किने कोहि दक्षिण फर्किने भयो भने विकास हुन सक्दैन, त्यस कारण दक्षिण फर्कदा पनि एकैचोटि फर्किनु पर्छ । उत्तर फर्कदा पनि एकैचोटि फर्किनु पर्छ अनि मात्र विकास सम्भव छ,’ अध्यक्ष भोलनले भने ।
अध्यक्ष भोलनले सिन्धुली जिल्लाकै विकट गाउँपालिका भएको सबै तहका सरकारले विकास निर्माणमा प्राथमिकतामा राख्नुपर्ने बताउँदै सांसद दाहाललाई प्राथमिक क्षेत्रका रुपमा राखिदिन आग्रह गरे ।
गाउँपालिकाका उपाध्यक्ष शंकरमान घलानले घ्याङलेख गाउँपालिकाको ५ वटा वडाको स्वास्थ्य चौकीमध्ये सबैभन्दा पहिलो पटक ४ नम्बर वडालाई बजेट परेपनि जमिनको अभावको कारण अन्य वडामा भवन बनिसक्दा पनि भवन निर्माणमा समस्या भएको गुनासो राखे ।
भवन निर्माणमा आफैले लगातार अनुगमन गरेपनि निर्माण व्यवसायीले लापरबाहि गरेको उपाध्यक्ष घलानको भनाई ।
नवनिर्मित स्वास्थ्य चौकी भवनबाट गणस्तरीय स्वास्थ्य सेवा दिन गाउँपालिकाले अधिकतम पहल गर्ने प्रमुख प्रशासकीय अधिकृत दाताराम प्याकुरेलको भनाई छ । गाउँपालिकाले नीति तथा कार्यक्रम अनुसार गाउँपालिका स्तरीय एमविविएस डाक्टर नियुक्ति गरेर सेवाग्राहीलाई गुणस्तरीय स्वास्थ्य सेवा प्रवाह गर्ने तयारी गरिएको उनले जनाए ।
सघन सहरी तथा भवन निर्माण आयोजनाको १ करो २२ लाख रुपैयाँ लागतमा उक्त भवन निर्माण गरिएको हो ।
स्वास्थ्य चौकी भवन निर्माण भएपनि स्वास्थ्य उपकरण भने नभएको अस्पतालका इन्चार्ज रामनाथ मण्डलको गुनासो छ ।
अस्पतालमा सिअहेव १, हेल्थ असिष्टेण्ट १, अनमि ३ र कार्यालय सहयोगी कार्यरत रहेका छन् ।
स्वास्थ्य चौकीमा एउटा मात्र बेड भएको, वर्थिङ्ग सेन्टर समेत भएको स्वास्थ्य चौकीमा डेलिभरी वेड नभएको, इस्टुमेन्ट, ल्यावको अभाव भएको मण्डलको गुनासो छ । स्वास्थ्य चौकीमा घ्याङलेख गाउँपलिका ३ र ४ का आहाले, भोटथुम, सुब्बाडाँडा, जुरे, केराबारी, कालिखोला, गोपे, गोठडाँडा र सिखरपुरबाट उपचारका लागि आउने गरेका छन् ।
