सिन्धुली । स्थानीय तह वित्तीय सुशासन जोखिम मूल्यांकनमा सिन्धुली जिल्लाका नांै वटा स्थानीय तहमध्ये सिन्धुलीको दुधौली नगरपालिका प्रथम र गोलन्जोर गाउँपालिका दोस्रो उत्कृष्ट पालिका भएका छन् । निश्चित मापदण्डका आधारमा गरिएको मूल्यांकनमा सबैभन्दा बढी अंकभार प्राप्त गर्दै दुधौली नगरपालिका पहिलो र गोलन्जोर गाउँपालिका दोस्रो हुदै उत्कृष्ट ठहरिएका हुन ।
राष्ट्रिय प्राकृतिक श्रोत तथा वित्त आयोगले आर्थिक बर्ष २८०÷०८१ को कार्यसम्पादनको आधारमा गरेको स्थानीय तहहरुको मूल्यांकनमा दुधौली नगरपालिकाले ७३ दशमलव १ अंक सहित सिन्धुली जिल्लाकै उत्कृष्ट नगरपालिका भएको छ ।
दुधौली नगरपालिका बागमती प्रदेश तर्फ नगरपालिकाहरुमा दोश्रो र बागमती प्रदेश तर्फ स्थानीय तहहरुमा ५ औं स्थानमा पर्न सफल भएकोमा दुधौली नगरपालिका मेयर दिनेश अधिकारीले बताए ।
यस्तै गोलन्जोर गाउँपालिकाले राष्ट्रिय प्राकृतिक श्रोत तथा वित्त आयोगले आर्थिक बर्ष २८०÷०८१ को कार्यसम्पादनको आधारमा गरेको स्थानीय तहहरुको मूल्यांकनमा ६९ दशमलव ६ अंक प्राप्त गरी सिन्धुली जिल्लाका स्थानीय तहहरुमध्ये दोस्रो भएको छ ।
जिल्ला समन्वय समितिका अनुसार स्थानीय तह वित्तीय सुशासन जोखिम मूल्यांकनमा गोलन्जोर गाउँपालिकाले आर्थिक वर्ष २०८०÷०८१ को स्थानीय तह संस्थागत स्वमूल्यांकन (लिजा) मा ६५ अंक र स्थानीय तह वित्तीय सुशासन जोखिम मूल्याङ्कन एफआएमा ७१ दशमलव ५ अंक प्राप्त गरेको छ ।
यस्तै ६९ दशमलव ८ प्रतिशत अंकभार प्राप्त गर्दै जिल्लाको हरिहरपुरगढी गाउँपालिका तेस्रो भएको छ भने ५९ दशमलव ८ प्रतिशत अंकभार प्राप्त गर्दै मरिण गाउँपालिका चौथो र ५८ दशमलव ८ प्रतिशत अंकभार प्राप्त गर्दै तीनपाटन गाउँपालिका पाँचौ भएका छन् । ५७ दशमलव ५ प्रतिशत अंकभार प्राप्त गरेर फिक्कल गाउँपालिका छैठौंै र ५५ दशमलव ६ प्रतिशत अंकभार प्राप्त गरेर कमालामाई नगरपालिका सातौंै स्थानमा परेको छ । घ्याङलेख गाउँपालिकाले ५४ दशमलव ७ अंक प्राप्त गरेको छ भने सुनकोशी गाउँपालिकाले ४९ दशमलव ३ प्रतिशत अंक ल्याएर सबैभन्दा अन्तिम स्थानमा परेको छ ।
यो मूल्यांकन गाउँपालिकाले अघिल्लो आर्थिक वर्षमा गरेका वित्तीय सुशासन र सदाचारको आधार गरिएको मुल्यांकन हो ।
राष्ट्रिय प्राकृतिक श्रोत तथा वित्त आयोगले योजना, बजेट तथा कार्यक्रम व्यवस्थापन, कार्यान्वयन क्षमता तथा व्यवस्थापन, लेखाङ्कन तथा प्रतिवेदन, अनुगमन मूल्यांकन तथा लेखा परीक्षण र राजस्व व्यवस्थापन लगायतका क्षेत्रलाई समेटेर अंकभार दिँदै मुल्यांकन गरेको थियो ।
