कमलामाई नगरका युवालाई निशुल्क मोटरसाइकल मर्मत तालिम

सिन्धुली  । वैदेशिक रोजगारबाट फर्किएका तथा स्वदेशमै बेरोजगार रहेका युवाहरुलाई स्वदेशमै रोजगार बनाउँने उद्देश्यले सिन्धुलीको कमलामाई नगरपालिकाले मोटरसाइकल मर्मत तालिम दिन थालेको छ ।
उनिहरुलाई स्वदेशमै रोजगार बनाउने उद्देश्यले नगरका १४ जना युवाहरुलाई निशुल्क मोटरसाइकल मर्मत सम्बन्धी तालिम सञ्चालन गरिएको बताइएको छ ।
उक्त मोटरसाइकल मर्मत तालिम शुक्रबारबाट सुरु गरिएको हो । तालिममा नगरका १४ वटै वडाबाट प्रतिनिधित्व हुने गरी १४ जना सहभागि रहेको कमलामाई नगरपालिकाका कार्यवाहक मेयर पूर्णबहादुर खड्काले जानकारी दिए ।
कार्यबहाक मेयर खड्काको प्रमुख आतिथ्यतामा तामिलको एक कार्यक्रमका विच शुक्रवार उद्घाटन समेत गरिएको छ ।
तामिलको उद्घाटन गर्दै कमलामाई नगरपालिकाका ५ का वडा अध्यक्ष एवम् कार्यवाहक मेयर खड्काले सीप सिकेर व्यवहारमा लागु गर्नुपर्नेमा जोड दिए । सीप सिक्ने बित्तिकै रोजगार बन्न सक्ने र अहिले मोटरसाइकल नहुने घर नै नभएकाले स्वरोजगार बन्ने गतिलो माध्यमलाई सदुपयोग गर्न उनले आग्रहसमेत गरे ।
युवाहरूलाई सीप सिकाई दक्ष बनाउने र रोजगारी सिर्जना गर्ने गरी निःशुल्क तालिम सञ्चालन गरिएको कमलामाई नगरका रोजगार संयोजक श्याम कुमार घलानले जानकारी दिए ।
‘स्वदेशरमै रोजगारको अवसर नपाएको भन्दै युवाहरूको विदेसिने क्रम बढीरहेको बेला स्वदेशमा नै स्वरोजगार बनाउने गरी एक महिनाको मोटरसाइकल मर्मत (मेकानिकल) तालिम सञ्चालन गरिएको हो,’ संयोजक घलानले भने । सहभागिहरुलाई तालिमको सहजीकरण गेहेन्द्र श्रेष्ठले गर्ने बताइएको छ ।